User:Mårtensås/Hildebrandslied/norm

Normalized

The aim of this normalization is to present the poem with unusually inconsistent manuscript spelling in a standard orthography, which however is still not standard Old High German, but preserves archaisms such as h- before w and r and unstressed vowels like -i in hrusti and -u in sunu. Further the younger diphthong ou is rendered as elder au.

ih gihōrta daz sagēn
daz sih urheizun · einen muotīn
Hiltibrant inti Hadubrant, · untar herim zweim
sunufaterungo, · iro saro rihtun
5 garotun sie iro gundhamun, · gurtun sih iro swërt ana,
helida ubar hringa · dō sie zi dëru hiltiu ritun,

Hiltibrant gimahalta Heribrantes sunu · ër was hērōro man 
fërahes fruotōro, · ër frāgēn gistuont
fōhēm wortum, · hwër sīn fater wāri
10 firahio in folke · […]
“ […] · ëdo hwiolīhhes knuosales dū sīs,
ibu dū mir einan sagēs, · ih mir diu anderiu weiz
kind in kuningrīhhe, · kund ist mīn al irmindiot,”

Hadubrant gimahalta · Hiltibrantes sunu:
15 “daz sagētun mir unsere liuti
alte inti fruote · die ērhina wārun,
daz Hiltibrant hiezi mīn fater, · ih heizu Hadubrant,
forn ër ōstar gihweiz · flōh ër Ōtakares nīd
hina mit Diotrīhhe · inti sīnero dëgano filu,
20 ër firliez in lante · luzzila sizzen
brūt in būre · barn unwahsan
erbio lōsa · ër reit ōstar hina
dës sīd Diotrīhhe · darbā gistuontun
fateres mīnes, · daz was sō friuntlōs man
25 ër was Ōtakare · unmëz zirri
dëgano deckisto · unzi Diotrīhhe,
ër was io folkes az ente · imu was io fëhta zi liob
kund was ër · kuonēm mannum
[…] · nī̆ wānu ih ju līb habe”

30 “weizu irmingot [quad Hiltibrant] obana aba hebane
daz dū nio danne halt · mit sus sibbin man
ding nī̆ gileitōs,
want ër dō ur arme · wuntane bauga
keisaringu gitān, · sō imu sie dër kuning gab
35 Hūnio truhtīn, · daz ih dir iz nū̆ bī huldī gibu.”

Hadubrant gimahalta · Hiltibrantes sunu:
“mit gēru scal man · gëba intfāhan
ort widar orte, · […]
dū bist dir altēr Hūn · unmëz spāhēr
40 spenis mih mit dīnēm wortum · wili mih dīnu spëru wërfan,
bist alsō gialtēt man · sō dū ēwīn inwit fuortōs
daz sagētun mir · sēolīdanta
wëstar ubar wentilsēo · daz man wīg firnam,
tōt ist Hiltibrant · Heribrantes sunu.”

45 Hiltibrant gimahalta · Heribrantes sunu:
“wëla gisihu ih in dīnēm hrustim
daz dū habēs heime · hērrun guotan
daz dū noh bī dësemu rīhhe · recko nī̆ wurti,

wëlaga nū̆ waltant got [quad Hiltibrant] wēwurt scihit
50 ih wallōta sumaro inti wintaro · sëhszug ur lante,
dār man mih io scerita · in folk sciozentero
sō man mir az burg einīgeru, · banūn nī̆ gifasta,
nū̆ scal mih swāsaz kind, · swërtu hauwan
brëtōn mit sīnu billiu · ëdo ih imu zi benin wërdan,
55 doh maht dū nū̆ ōdlīhho · ibu dir dīn ellan taug,
in sus hēremu man · hrusti giwinnan
rauba birahanen, · ibu dū dār einīg rëht habēs,

dër sī doh nū̆ argōsto [quad Hiltibrant] ōstarliuto
dër dir nū̆ wīges werne · nū̆ dih ës sō wëla lustit,
60 gundia gimeinūn · niuse dër muozi,
hwëdar sih dëro hiutu · hregilo ruomen muozi,
ëdo dësero brunnōno · beidero waltan,”

dō liezun sie ērist · escim scrītan
scarpfēm scūrim · daz in dēm sciltim stuont,
65 dō stuoftun zisamane · steimbort hlūtun,
hiewun hermlīhho · hwīze scilti
unzi im iro lintūn · luzzilo wurtun,
giwigan mit wāfnum