2015 — Monternel, Fred Fuentes, Mibalik si Veronica (31 October), SuperBalita
Gipangunayan niya ang pagpanangpit ang mga kalag alang sa iyang dalit, lakip ang iyang ginikanan. Gisangpit niya ang iyang asawa, “Arsing, niay espisyal kong halad nimo. Ang imo ning ampay, usa ka buok linat-ang manok nga bisaya. Sayod kong ania ka karon… giduaw mo ako atol ning inyong adlaw. Way paghupas ang gugma ko kanimo!” Gipiyong ni Medyo ang iyang mga mata. Natapos na ang iyang pagpanangpit. Pagbuka niya sa iyang mga mata, nahikurat siya. May pinaksitan na ang pitso sa manok. Tunga na lang sab ang sabaw nga gisulod niya sa yahong. Milingi-lingi siya. Nahinumdom dayon siya kang Arsenia.
